Bakı şəhəri Səbail rayonu Məmməd Rahim adına 7 nömrəli
tam orta məktəbdə “Şuşanın 270 anı” bədii-sənədli filminin təqdimat mərasimi
keçirilib.
Tədbirdə
tanınmış jurnalist, filmin müəllifi Lalə Azərtaş, Səbail rayonu İcra başçısının
müavini Kəmalə Həşimova, Səbail rayonu Gənclər və İdman İdarəsinin müdiri
Elnarə Əliyeva, jurnalist Kərəm Ələsgərov həmçinin, 7 nömrəli məktəbin qəhrəman
məzunları “Xüsusi təyinatlıların qaziləri, şəhid ailələri və veteranları”
İctimai Birliyinin sədr müavini Bəhruz Məmmədzadə və Elşən Namazlı iştirak
ediblər. Öncə qonaqlar məktəbin dəhlizində Şuşa ilinə həsr olunmuş müxtəlif
divar rəsmləri və şagirdlərin əl işlərilə tanış olublar.
Ardınca “Cəmiyyətin və
Medianın İnkişafı” İctimai Birliyinin sədri, layihə rəhbəri Lalə Azərtaş filmin
ərsəyə gəlməsi ilə bağlı görülən işlər haqqında məlumat verib. O bildirib ki,
layihə çərçivəsində Azərbaycan, rus və ingilis dillərində https://loveshusha.com adlı sayt da yaradılıb.
Saytda layihə çərçivəsində görülən işlər, Şuşanın tarixi, Vətən müharibəsindən
sonra qısa müddət ərzində şəhərdə gerçəkləşdirilən quruculuq işləri ilə bağlı
məlumatlar, həmçinin şəhərlə bağlı fotolar və məqalələr toplanıb.
Tədbirdə,
həmçinin layihə çərçivəsində hazırlanan “Şuşa 270” adlı nəşr təqdim edilib.
Diqqətə çatdırılıb ki, Azərbaycan, ingilis, və rus dillərində yüksək
keyfiyyətlə hazırlanan nəşrdə Şuşa sakinləri üçün əziz olan və işğal zamanı
bütün təhlükələrə baxmayaraq, şəhərdən çıxardıqları əşyalarla bağlı məlumatlar
əksini tapıb.
Sonra
Səbail rayonu İcra başçısının müavini Kəmalə Həşimova çıxış edib. Qeyd edib ki,
Qarabağda əldə olunan möhtəşəm Zəfəri, qəhrəman oğullarımızın şücaətini gələcək
nəsillərə ötürmək, onları vətənpərvər ruhda yetişdirmək işində təhsil
işçilərinin üzərinə böyük məsuliyyət düşür. Kəmalə Həşimova gənc nəslin Zəfər
tariximizdən sonrakı mərhələdə vətənpərvərlik, milli-mənəvi dəyərlər ruhunda
tərbiyəsinin bu gün qarşımızdakı ən önəmli hədəflərdən biri olduğunu söyləyib.
O, qeyd edib ki, bu gün “Şuşanın 270 anı” filminin məktəbdə keçirilən təqdimatı
da bu missiyadan irəli gəlir.
Eyni
zamanda, məktəbin direktoru Könül Təhməzova öz çıxışında Vətən müharibəsi ilə
bağlı fikirlərini paylaşıb, müzəffər Ali Baş Komandanın qətiyyəti və igid
Azərbaycan oğullarının canı-qanı hesabına torpaqların düşmən tapdağından azad
edildiyinin bizim üçün qürur örnəyi olduğunu bildirib. Şagirdlərə Vətənə
sevginin uşaq yaşlarından aşılanmalı olduğunu xüsusi qeyd edib.
Tədbir
boyu məktəbin şagirdləri tərəfindən hazırlanmış müxtəlif kompozisiyalar nümayiş
etdirilib.
Qeyd edək ki, “Şuşanın 270 anı” bədii-sənədli filmi “Cəmiyyətin və Medianın İnkişafı” İctimai Birliyinin Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi “Şuşanı tanıyaq, tanıdaq!” layihəsi çərçivəsində ərsəyə gəlib.