Şuşa +13 °C  
"Şuşanın 270 anı" 194 nömrəli məktəbdə

"Şuşanın 270 anı" 194 nömrəli məktəbdə

Bakı şəhəri Xətai rayonu Zakir Yusifov adına 194 nömrəli tam orta məktəbdə “Şuşanın 270 anı” bədii-sənədli filminin təqdimat mərasimi keçirilib.

Tədbirdə tanınmış jurnalist, filmin müəllifi Lalə Azərtaş, Şəhid Rövlan Məmmədovun valideynləri Solmaz Məmmədova və Qurban Məmmədov, jurnalist Kərəm Ələsgərov həmçinin, 194 nömrəli məktəbin kollektivi iştirak ediblər.

Əvvəlcə qonaqlar məktəbin dəhlizində Şuşa ilinə həsr olunan müxtəlif divar rəsmləri və şagirdlərin əl işlərilə tanış olublar. Ardınca “Cəmiyyətin və Medianın İnkişafı” İctimai Birliyinin sədri, layihə rəhbəri Lalə Azərtaş filmin ərsəyə gəlməsi ilə bağlı görülən işlər haqqında məlumat verib. O bildirib ki, layihə çərçivəsində Azərbaycan, rus və ingilis dillərində https://loveshusha.com adlı sayt da yaradılıb. Saytda layihə çərçivəsində görülən işlər, Şuşanın tarixi, Vətən müharibəsindən sonra qısa müddət ərzində şəhərdə gerçəkləşdirilən quruculuq işləri ilə bağlı məlumatlar, həmçinin şəhərlə bağlı fotolar və məqalələr toplanıb.

Tədbirdə, həmçinin layihə çərçivəsində hazırlanan “Şuşa 270” adlı nəşr təqdim edilib. Diqqətə çatdırılıb ki, Azərbaycan, ingilis, və rus dillərində yüksək keyfiyyətlə hazırlanan nəşrdə Şuşa sakinləri üçün əziz olan və işğal zamanı bütün təhlükələrə baxmayaraq, şəhərdən çıxardıqları əşyalarla bağlı məlumatlar əksini tapıb. Eyni zamanda, məktəbin direktoru Elnarə Zeynalova öz çıxışında Vətən müharibəsi ilə bağlı fikirlərini paylaşıb, müzəffər Ali Baş Komandanın qətiyyəti və igid Azərbaycan oğullarının canı-qanı hesabına torpaqların düşmən tapdağından azad edildiyinin bizim üçün qürur örnəyi olduğunu bildirib. Şagirdlərə Vətənə sevginin uşaq yaşlarından aşılanmalı olduğunu xüsusi qeyd edib.
Qeyd edək ki, “Şuşanın 270 anı” bədii-sənədli filmi “Cəmiyyətin və Medianın İnkişafı” İctimai Birliyinin Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi “Şuşanı tanıyaq, tanıdaq!” layihəsi çərçivəsində ərsəyə gəlib.