Ağdam
rayonu Mahrızlı kənd tam orta məktəbi üçün 320 şagird yerlik yeni bina inşa
edilir.
Tikintidə iş icraçısı Vaqif
Əsədov bildirib ki, məktəb binası ikimərtəbəli olmaqla, beş korpusdan
ibarətdir. Binada sinif otaqları, kimya, biologiya və fizika laboratoriyaları,
hərbi hazırlıq, informatika və hesablama texnologiyası kabinələri, idman və akt
zalları, kitabxana, yeməkxana, inzibati otaqlar yaradılacaq. Həyətdə idman
meydançası, qazanxana, nasosxana, transformator yarımstansiyası, generator,
içməli, çirkab və yanğın əleyhinə su anbarları inşa ediləcək, abadlıq işləri
aparılacaq, yaşıllıq salınacaq.
Hazırda binanın bir korpusunda
tikinti, digər korpuslarda isə santexnik, suvaq işləri görülür, dam hissəsi
vurulur. Məktəbin tikintisinin bu ilin may ayında başa çatdırılması nəzərdə
tutulur.
Qeyd edək ki, Mahrızlı kənd tam
orta məktəbinin binası 1987-cı ildə Gürcüstanda baş verən təbii fəlakət zamanı
insanları xilas edən zaman qəhrəmancasına həlak olmuş cəsur əsgər Rahib
Məmmədovun şərəfinə tikilib. Vətən müharibəsi zamanı düşmənin artilleriya
atəşinə məruz qalan məktəb binasının bir hissəsi yararsız hala düşmüşdü.
Müharibə başa çatandan sonra bina qismən bərpa olunub və məktəbdə tədris davam
etdirilib. Ötən ilin may ayından isə məktəb üçün yeni binanın tikintisinə
başlanılıb.