Dövlət Proqramının Tədbirlər Planının əhalinin
geri qayıdışının və ərazilərə inteqrasiyasının təmin edilməsi fəaliyyət
istiqaməti üzrə Füzuli rayonunda 2026-cı ilədək ümumilikdə 5678 evin - 3352
fərdi yaşayış evinin və 2326 mənzilin tikilərək istismara verilməsi nəzərdə tutulur.
Bunu Dövlət Şəhərsalma və Arxitektura Komitəsi
sədrinin birinci müavini, Şəhərsalma məsələləri üzrə işçi qrupunun rəhbəri
Namiq Hümmətov Əlaqələndirmə Qərargahının İdarələrarası Mərkəzinin nəzdində
fəaliyyət göstərən Şəhərsalma Məsələləri üzrə İşçi Qrupun bu gün Füzuli
Beynəlxalq Hava Limanında keçirilən iclasında bildirib.
Onun sözlərinə görə, ümumilikdə, 2023-cü ildə
399, 2024-cü ildə 447, 2025-ci ildə 2317, 2026-cı ildə 2515 evin inşası həyata
keçiriləcək. MİDA tərəfindən inşa olunan 846 mənzillik yaşayış kompleksinə
2024-cü ildə ilk əhali (2904 nəfər) köçürüləcəkdir.
"Bütövlükdə tikiləcək evlərə 21593 nəfər,
o cümlədən Füzuli şəhərinə 8009 nəfər əhalinin köçürülməsi planlaşdırılır.
Bundan əlavə Füzuli rayonunda Peşə Liseyinin, Mərkəzi
xəstəxananın, Mərkəzi Parkın, inzibati binanın layihələndirmə işləri sürətlə
davam etdirilir", - deyə o, əlavə edib.