Oktyabrın 31-də Şuşada Milli Məclisin Elm
və təhsil və Mədəniyyət komitələrinin birgə iclası keçirilib. İclasda, əvvəlcə
Azərbaycanın ərazi bütövlüyü uğrunda canlarından keçmiş şəhidlərimizin xatirəsi
bir dəqiqəlik sükutla yad edilib. Sonra
gündəlik açıqlanıb. Elm və təhsil komitəsinin sədri
iclasın müzakirəsinə
“Ali təhsil haqqında” qanun layihəsinin və “İşğaldan azad olunmuş ərazilərdə
tarixi-mədəni abidələrin bərpası sahəsində tədbirlər” mövzusunun daxil
edildiyini bildirib. Bəxtiyar Əliyev 12
fəsil 55 maddədən ibarət qanun layihəsinin istiqamətləri, prinsipləri barədə
danışıb, sənəddə əks olunan ali təhsilin dövlət standartları, keyfiyyət
təminatları, mərhələləri və digər məsələlər barədə ətraflı izahat verib. Komitələrin birgə iclasının ikinci məsələsini
Milli Məclisin Mədəniyyət komitəsinin sədri Qənirə Paşayeva müzakirəyə təqdim
edib. O, Azərbaycan xalqına məxsus tarixi və dini abidələrə, mədəni irsə qarşı
Ermənistanın yürütdüyü vandalizm siyasətindən bəhs edib. Bildirib ki,
Ermənistanın torpaqlarımızı 30 illik işğalda saxladığı dövrdə bu vandalizm heç
bir sərhəd tanımayıb. Sonda “Ali təhsil haqqında” qanun layihəsi irəli
sürülən rəy və təkliflər nəzərə alınmaqla Elm və təhsil komitəsinin iclasında
baxılmağa məqbul sayılıb.